حينما تصبح الدعارة زواجاً

 
 حينما تصبح الدعارة زواجاً

الكاتب سامي البحيري
 
من أفضال الله عليَّ أن زوجتي لا تقرأ مقالاتي، ولها في هذا حججاً كثيرة، منها أنها تفضل القراءة باللغة الإنجليزية، ثانياً أن مقالاتي تعرض المشاكل ولا تعرض الحلول، ثالثاً أن مقالاتي دمها ثقيل، ورابعاً أن ماعندهاش وقت للقراءة حيث أن وقتها موزع ما بين عملها وشغل البيت والإهتمام بالبنات، المهم أنني حمدت الله على هذا، وهذا أعطاني مجالا إلى أن آخد راحتي عند كتابة أي مقال، وهذا المقال بالذات أرجو ألا تعثر فيه زوجتي، كما أرجو من أصدقائي وأقاربي والذين يعرفون عنوان البريد الإلكترونى لزوجتي ألا يحاولوا أن يعملوا فيَّ مقلب بإرسال هذا المقال إلى زوجتى.
وقد أضطرتني الظروف الاقتصادية الأخيرة إلى أن أترك زوجتي وأسرتي للعمل في مكان آخر، ومنذ أن أنتقلت إلى مكان عملي الجديد وجدتني أشعر بوحشة ووحدة شديدة، وسمعت كثيراً عن أن هناك نوادي للتعارف، ولكني إستبعدت الذهاب إلى مثل تلك النوادي، وكذلك عرفت عن طريق الإنترنت عشرات المواقع للتعارف، ولكني وجدت أن أفضل شيء هو أن أتزوج زواجاً حلالا خلال الفترة التى أبتعد فيها عن زوجتي، ولم أقرر بعد إذا كنت سوف آخذ رأي زوجتي في هذا القرار التاريخي والاستراتيجي أم لا؟ وقلت خلينا الأول نجد الزوجة المؤقتة وبعدها يحلها حلاّل، وسمعت عن عدة أنواع من الزيجات المؤقتة والتى يوافق عليها بعض الفقهاء، مثل زواج المتعة واستبعدت هذا الزواج لأنه منتشر أكثر بين الشيعة وأنا لست شيعياً، لذلك بقي نوعين من الزواجات: زواج المسيار، والزواج الآخر هو ما يقال له زواج على أبوها، ولكي أعرف الفرق وجدت إعلاناً في إحدى المواقع العربية ويسأل الإعلان صراحة: هل ترغب فى زوجة مسيار؟ إتصل بنا على التليفون *****
ووجدتني مدفوعاً بحب الاستطلاع الغريزي وبتأثير شعور الوحدة أتصل بالتليفون، واكتشفت أن المكالمة سوف يتم تحصيل قيمتها من تليفوني ويتم الحساب بالدقيقة، وقلت لنفسي مش مهم نصرف كام دولار، لأنني أبحث عن زوجة ولا أشتري فرخة، فالموضوع يستاهل التضحية رغم الأزمة المالية العالمية.
ودار بيني وبين شخص ما هذا الحوار التليفوني:
- مساء الخير، معاك سامي.
- أهلا مساء الخير، معاك "قرني أبو ثور" من شركة "مسياركو للزواجات السريعة".
- كنت قريت إعلان عن زواج المسيار وزواج على أبوها عن طريق شركتكم، شركة مسياركو.
- أيوه ده الإعلان بتاعنا، إنت عارف طبعا إننا بنسجل المكالمات وذلك لأمور قانونية وأيضاً سوف تكلفك المكالمة دولار ونصف للدقيقة الواحدة، فهل توافق.
- أوافق بس لو سمحت ممكن تتكلم بسرعة شوية.
- طلباتك إيه؟
- أولاً عاوز أعرف إيه الفرق بين زواج المسيار وزواج على أبوها؟
- زواج المسيار إنت بتتجوز واحدة ويكون عندها بيت ومستقلة بنفسها أو إنك بتفرش لها بيت وكل ما تحب تعدي عليها، تعدي عليها تبات معاها ليلة أو ليلتين أو أي عدد من الليالي زي ما انت عاوز وبعدين تسيبها وترجع لبيتك وولادك.
- طيب وزواج على أبوها؟
- زواج على أبوها، إن البنت ما تسيبش بيت أبوها، وإنت تعدي عليها كل كام يوم ولما توصل (وفي وجود أبوها وتحت إشرافه) تدخل غرفة النوم معاها، وتمارس معاها ما يمارسه الأزواج، وبعدين لو حبيت تستنى للعشاء ما فيش مانع أو لو حبيت تمشى بسرعة عشان تلحق تتعشى مع مراتك وولادك، ده شيء يرجع لك.
- طيب وده كله في مقابل إيه؟
- في مقابل إنك تصرف على الزوجة مصاريفها الشخصية بالكامل إلى جانب مصروف إيد يومياً يتم الاتفاق عليه، وبعدين كل لما تزورها ليلة تديها اللي فيه النصيب.
- طيب أنا عندي استفسار بس محرج شوية!
- إتفضل.
- وإيه الفرق بين أنواع الزواج ده وبين لا مؤاخذة الدعارة؟
- لا يا أستاذ: دي زيجات موثقة بالشهود وبموافقة الأهل، وعلى سنة الله ورسوله، وفيه شهادة زواج زيها زي أي زواج آخر، وبعدين دي زيجات حللها الشرع، وعندي فتاوى من كبار علماء المسلمين ممكن أبعثها لك بالإيميل على ملف (بى دى إف).
- طيب ولو الزواج أنتج أولاد، يكون إيه العمل؟
- عادة الزيجات دي بتكون مؤقتة ولا ينتج عنها أولاد، وطبعا هناك موانع الحمل المعروفة اللي حضرتك ممكن تستخدمها، وشركتنا غير مسئولة عن أى أطفال تنتج بسبب الزواج ده، وده حيكون بند من بنود التعاقد معاك لو حصل نصيب.
- طيب وإنت بذمتك لو عندك بنت كنت ترضى تجوزها بالطريقة دي؟
- طبعا أنا عندي عقبال عندك بنتي (سناء) لغاية دلوقتي إتجوزت سبع مرات زواج مسيار وأربع مرات زواج على أبوها، ولسه ما كملتش خمسة وعشرين، وبتكسب كويس قوي من الموضوع ده وبتقدر تصرف على نفسها وساعات بأستلف منها.
- يا نهار أبيض إتجوزت حداشر مرة وعندها خمسة وعشرين سنة؟
- آه ما الجوازة من دول ما تكملش شهرين وإقلب.
- وياترى عمرها إتجوزت أكثر من واحد في نفس الوقت؟
- إيه إللى بتقوله ده يا إستاذ، إحنا ناس نعرف ربنا ونعرف الشرع، بنتي عمرها ما إتجوزت أكثر من راجل واحد في نفس الوقت.
- ويا ترى إيه أقصر وأطول جوازة معاها؟
- فيه واحد إتجوز وطلق في نفس الليلة، وده كان رقم قياسي، وأعطاها خاتم ألماظ للخطوبة ومهر خمسة آلاف دولار، وبعد كده رمى عليها يمين الطلاق، بعد كده ما شفناش وشه.
- طيب وده ممكن يرجع تانى.
- آه ساعات بيرجعوا ويردوها على ذمتهم.
- طيب وأطول جوازة؟
- في واحد بقى خلاها على ذمته أكثر من ست شهور.
- ياه ده عصلج معاها قوي.
- آه ولقيناه إنه حيوقف حال البنت، وبعدين كان بخيل جداً، بس إحنا رضينا بيه عشان حالة سوق الزواج كانت نايمة شوية.
- طيب وده عملتم معاه إيه ده؟
- أنا فكرت إننا نرفع عليه قضية خلع، لكن ما لقيتش عندنا مبررات قانونية وبعدين المحامين حياخدوا الشيء الفلاني والعملية حتوقف علينا بالخسارة، لكن بنتي الله يجازيها عملت فيه حتة عملة.
- خير عملت إيه؟
- بقى كل ما ييجي بالليل يتعشى تحط له شربة ملح إنجليزي في الأكل، وبقى كل ليلة ييجي له إسهال لما يروح لمراته، وفي الآخر قال لها: "إنت أكلك بيجيب لي إسهال ونفسي إتسدت عنك روحي وإنت طالق"، وإحنا طبعا ما صدقناش، ويومها عملنا فرح وجبنا رقاصة في البيت.
- طيب أنا فهمت الحدوتة، دلوقت أنا أفضل زواج المسيار، ياترى عندك إيه؟
- أنا عندي قاعدة بيانات (داتا بيس) كبيرة جداً إنت قوللي نفسك في إيه وأنا جاهز، عندي الشقراء والسمرا والسودة وعندى من أول 18 سنة لغاية خمسين سنة وفيه العربية والفليبينية والباكستانية، قول لي تؤمر بإيه.
- خلينا نغير شوية، ناخد واحدة شقراء، وخلينا مع بنات العرب، والسن في حدود الثلاثين.
- دقيقة واحدة خليك معايا لما أبص على الكومبيوتر ... آه فيه عندي واحدة هايلة شقراء عندها تسعة وعشرين سنة وممكن تبقى فاضية بعد أسبوعين لأن عندها جوازة لقطة ضروري تخلص منها، إلا لو كنت مستعجل عندي واحدة جاهزة الليلة.
- لأ أنا مش مستعجل، طيب ممكن أشوف صورتها؟
- آه طبعاً بس فيه مصاريف للمكتب عشان نبعت لك الصورة بالإيميل.
- وكام يا ترى؟
- خمسين دولار بس؟
- ماشى ياسيدى، طيب بخصوص عقد الزواج والمأذون والشهود؟
- إحنا مرتبين كل حاجة، عندنا مأذون وشهود موجودين 24 ساعة 7 أيام فى الأسبوع، ومصاريف كلام فاضى.
- طيب ومصاريف مكتبكم؟
- إحنا عندنا أكثر من طريقة للدفع، الطريقة الأولى إنت تدفع مبلغ مقطوع مرة واحدة، أو تدفع بالليلة، إيه رأيك؟
- أنا شايف إني أدفع مبلغ مقطوع.
- مبروك مقدماً يا إستاذ سامي، ونتمنى لك جوازة سعيدة، وأرجو تتصل بينا لو فيه أي مشكلة مع العروسة، إحنا بندي ضمان تسعين يوم، أو ثلاثين ليلة زواج أيهما أسرع.
- متشكر قوي يا سيد "قرني".
تعليق: دعارة إيه يا عم؟ .. دي اسمها إعارة على سنّة الله ورسوله.